قرض برائے خرید زرعی آلات (چاول / گندم سٹرا بیلنگ مشین، منی روٹا ویٹر (واکنگ ٹریکٹر))

زرعی پیداوار میں اضافے کے لیے عالمی سطح پر بدلتے ہوئے رجحانات کے مطابق نئی ٹیکنالوجی اور جدید زرعی آلات کا استعمال وقت کی اہم ضرورت ہے۔ اس مقصد کے حصول کے لیے زرعی ترقیاتی بینک لمیٹڈ درج ذیل زرعی مشینوں کی خریداری اور کسان بھائیوں کی سہولت کے لیے قرضہ فراہم کرتا ہے۔

چاول / گندم سٹرا بیلنگ مشین

سٹرا بیلنگ مشین گندم اور دھان کے بھوسے کو ایک خاص دباؤ کے تحت گانٹھوں میں تبدیل کرتی ہے تاکہ بھوسے کی محفوظ طریقے سے نقل و حمل آسان ہو سکے۔ کٹائی کے بعد گندم اور دھان کے بھوسے کو جمع کرنے اور دوبارہ استعمال کے قابل بنانے میں یہ مشین معاون ثابت ہوتی ہے۔ دھان کے بھوسے کا بیلر ٹریکٹر سے منسلک ہوتا ہے۔ یہ بھوسے کو اکٹھا کرتا ہے اور ہائیڈرالک سسٹم کے ذریعے گانٹھوں میں منتقل کرتا ہے۔ مشین اگلی فصل کے لیے زمین تیار کرتی ہے، قدرتی اجزاء کو محفوظ کرتی ہے اور اس طرح کسان کی آمدنی میں اضافے کا باعث بنتی ہے۔

منی روٹا ویٹر (واکنگ ٹریکٹر)

منی روٹا ویٹر ایک مفید اور انتہائی کارآمد مشینری ہے جو چھوٹے باغات اور کھیتوں کی دیکھ بھال اور تیاری کے لیے موزوں ہے۔ یہ 4 سے 7 انچ تک مٹی کو نرم کرتا ہے اور ہوا رسانی میں مدد دیتا ہے۔ یہ جڑی بوٹیوں پر قابو پانے اور مٹی کی صفائی کے لیے بہترین مشینری ہے جسے چھوٹے کھیتوں، پھلوں اور سبزیوں کی کاشت، باغات، باغبانی اور نرسریوں میں استعمال کیا جا سکتا ہے۔ منی روٹا ویٹر (واکنگ ٹریکٹر) مٹی کی حالت کو بہتر بنانے، جڑی بوٹیوں پر قابو پانے، بیج بونے کے لیے زمین کی تیاری اور چھوٹے کھیتوں میں کھدائی کے لیے نہایت موزوں ہے۔

اس اسکیم کا دائرہ کار پورے ملک میں زرعی ترقیاتی بینک لمیٹڈ کی تمام برانچوں تک ہوگا۔